Home · Culture & Social · Nek'u'a dune ts'anle 'ink'ez lhunats 'uwudulh

Nek'u'a dune ts'anle 'ink'ez lhunats 'uwudulh

Dakelh k'u'a 'ink'ez ndez'a dune ts'anle

Dakelh dune huwhulhlih nts'oh dahutetsah whuts'un ne k'u'a dune hinli 'et hohudul'eh 'ink'ez tseyoh nuhudelh whuz'a dube neba hooncha ho 'ant'e.

Tilh 'uts'ulh'ih 'ink'ez Ne'ts'unuka

Dakelh dube tilh ghahughuna whe nahughenih inle. Tilh 'i k'i lat'ooz be 'uhuyulh’ih 'ink'ez duchun ghih be nehinuka inle, 'ink'ez tilh hik'ene'dulhtsi 'ink'ez hik'une'duk'un, dube unzoo huyulhtsih inle. Tilh buloh dube uncha huyulhtsih inle, 'i too hiyekunadulh, 'ink'ez ntsolyaz chah huyulhtsih, 'i mai huyeoonuye k’us lubot huyit'i inle.

Nts'ez'a nyoh hoh Nuts'udelh inle

'Udak'ez da dakelh 'ahoolhyez nuhune inle, 'uts'un keyoh whehunih, whuz 'uka'ut'en, lhook ghahughuna, bulunah nts'e 'uhutet'ilh whuz whehunih. Bulunah dakelh 'ants'ih hulhtunuhudelh, 'ahoolhyez nawhulnuk cha nyoh 'uts'un keyoh nuhulhte inle.

Khi totsuk 'aih be lhelhtunuhulghas ho 'ant'e. Nts'e 'uka'uhut'en, lhook ghahughuna, 'uhutet'ilh 'ink'ez nts'e mai lhai, hoh nduhoont'oh ts'iyaowh ti nuwhuz'a. 'Uts'un keyoh Tsilhkot'en tuz, 'utna tuz chah, nechowt'en tuz hoh nduhoont'oh teh ts'iyaowh ti nuhuwhulh'a.

Ts'i 'i soo dube huyene'ut'en inle. Ts'i 'i k'i lat'ooz be 'uhuyulh’ih inle, k'i be ts'i 'i ndzak, nawhul'ikyaz nuhuyughe. 'Onusyaz ndaz ts'i chah 'uhuyulh'ih, 'i (cottonwood) duchun be 'uhuyulh'ih. Ndi ndunt'i ts'i 'i dalhti nuhuyooghe sdabeh ndaz, tookoh hooncha zeh huyenuke, 'ink'ez nts'e huyenikih 'et 'aow'et nahuyulht'oh.